मीनबहादुर भामको निर्देशनमा बनेको फिल्म ‘शाम्बाला’ को नेपाली संस्करणको ट्रेलर सार्वजनिक भएको छ । मंगलबार आयोजित पत्रकार सम्मेलनमा फिल्मको दोस्रो ट्रेलर सार्वजनिक गरिएको हो ।
यो फिल्म भदौ २८ गतेबाट नेपालमा प्रदर्शन हुँदैछ । यो फिल्मलाई नेपालमा एप्पल इन्टरटेनमेन्टले प्रदर्शन गर्न लागेको हो । फिल्मको बर्लिन संस्करणको पनि ट्रेलर यसअघि आइसकेको छ । शाम्बाला’ को अन्तर्राष्ट्रिय प्रदर्शन अधिकार बेल्जियमको वितरण कम्पनी बेस्ट फ्रेन्ड फरेभरले लिएको छ ।
बर्लिन फिल्म फेस्टिभलमा वर्ल्ड प्रिमियर भएको यो फिल्म यसै महिना स्वीट्जरल्याण्डको लोकार्नो फिल्म फेस्टिभलमा पनि स्क्रिनिङ भएको थियो । यो फिल्म ड्रामा, एड्भेन्चर र म्याजिक रियालिजम जनरा बनाइएको छ।
फिल्मको प्रमुख भूमिकामा थिन्ले ल्हामो र सोनम तोप्देन रहेका छन भने टेन्जिन दल्हा, कर्मा वाङ्ग्याल गुरुङ, कर्मा शाक्य, लोटेन नामलिङ, जंगबहादुर लामा, छिरिङ छोडेन, छिरिङ ल्हामो गुरुङ, र छिरिङ छोएब्ले टोवा लगायतका कलाकारहरूको अभिनय रहेको छ।
१४ करोड रुपैयाँ बजेट रहेको यो फिल्मले नेपालको चलचित्र विकास बोर्डसहित विश्वका १७ अन्तर्राष्ट्रिय संस्थाबाट फण्ड जितेको हो। फिल्मलाई अहिलेसम्मकै महंगो नेपाली फिल्म बताइएको छ ।